Қазақ ұлттық спорт университеті жаттықтырушылық қызмет, спорт ғылымдары, спорттық медицина және оңалту, спорттық журналистика, менеджмент, спорттағы жасанды интеллект және аналитика, сондай-ақ киберспорт бағдарламалары бойынша кадрлар даярлайды.
Халықаралық серіктестіктер
Жоғары оқу орны Eklore-ed School of Management, Corvinus University, University of Guglielmo Marconi, Swiss Institute және Hungarian University of Sports Science секілді шетелдік университеттермен қос дипломды бағдарламалар мен академиялық ұтқырлықты дамытады. Xinhua Daily Media Group және Nanjing Polytechnic Institute-пен бірлесіп спорттық журналистика медиаорталығы құрылуда.
Жоғары оқу орны аумағындағы жобалар
Университет базасында құтқару инновациялары және алғашқы көмек орталығы, Women in Sport RK бастамасы, сондай-ақ Life Chance Grant және Merit Grant гранттық бағдарламалары жұмыс істейді. Спортшыларды диагностикалау, емдеу және ғылыми сүйемелдеуді біріктіретін спорттық медицина және оңалту орталығы құрылды.
Жасанды интеллект негізіндегі әзірлемелер
Премьер-министрдің визиті кезінде бірнеше жоба көрсетілді. Smart Performance Assessment тыныс алуды, өкпе желдетілуін, тамыр соғысын және қандағы оттегі қанықтылығын талдап, спортшының цифрлық профилін қалыптастырады. MY KNUS платформасы білім беру және әкімшілік процестерді бір қолданбада біріктіреді, ал SportAI жүктемелерді, жарақаттану қаупін және қозғалыс техникасын қадағалайды.
AI Video Analytics for Sports and Digital Biomechanics Lab қозғалыстарды бағалау үшін компьютерлік көруді пайдаланады. Smart Table Tennis AI Center үстел теннисінде соққылардың биомеханикасын және доптың траекториясын нақты уақыт режимінде бағалайды. Sport Media Convergence Co-Creation Lab спорттық журналистика және медиаөндіріс мамандарын даярлайды. Smart Golf AI Lab гольфқа арналған бейнеаналитика мен виртуалды тренажерлерді қолданады.
Жекелеген ғылыми жобалар орта және егде жастағы адамдарды жасанды интеллект арқылы бұқаралық спортқа тартуға және қазақ күресі бойынша даярлықты жекелендірілген тәсіл мен гипоксиялық жаттығуды қолдана отырып жетілдіруге бағытталған.