Тергеу компанияның лауазымды тұлғалары мемлекеттік сатып алуларға қатысу арқылы бюджет қаражатын ұрлау схемасын ұйымдастырғанын анықтады. Шығыс Қазақстан, Абай және Қостанай облыстарындағы тоғыз елді мекендегі сумен жабдықтау объектілерін, сондай-ақ дене шынықтыру-сауықтыру кешендерін реконструкциялау және салу бойынша 11 келісімшарт назарға алынды.
Объектілерді 2022 жылы пайдалануға беру жоспарланған, алайда жұмыстар аяқталмаған. Мемлекетке келтірілген залал 1,6 млрд теңгеден астам деп бағаланды. Сот шешімімен мүлік пен активтерге 1,3 млрд теңгеден астам сомаға тыйым салынды.
Тапсырыс берушілердің, мердігерлердің және техникалық қадағалау өкілдерінің лауазымды тұлғалары қылмыстық жауапкершілікке тартылуда. Департаментте әлеуметтік маңызы бар объектілерді салу кезіндегі ұрлықтарды анықтау жұмыстың басым бағыты болып қала беретінін атап өтті.