Тараптар халықаралық «Солтүстік — Оңтүстік» көлік дәлізін дамытуға назар аударды. 2025 жылдың қорытындысы бойынша оның бойынша тасымал көлемі 12%-ға өсіп, 3,5 млн тоннаны құрады, ал екі ел арасындағы теміржол тасымалы 69%-ға артты.
Серік Жұманғарин инфрақұрылымды жаңғырту бойынша бірлескен жол картасын дайындауды ұсынды. Мақсат — дәліздің өткізу қабілетін жылына 20 млн тоннаға жеткізу.
Порттарға ерекше назар аударылды. Иран Қазақстанға Шахид Раджаи портындағы (Бендер-Аббас) жер учаскесін беру келісімін аяқтады. Сонымен қатар, ирандық тарап Чабахар портында жұмыс істеу мүмкіндіктерін ұсынуға дайын екенін растады. Захедан — Чабахар теміржол желісінің құрылысы 90%-дан астам аяқталды, іске қосу жақын айларда күтіледі.
Өз кезегінде Қазақстан Ақтау және Құрық порттарында ирандық компанияларға алаңдар, айлақтар және терминалдар беру мәселесін қарастыруға дайын.
Тараптар Қытай, Түрікменстан және Түркия қатысатын бесжақты теміржол келісімінің маңызын, сондай-ақ Қазақстан, Ресей, Түрікменстан және Иран арасындағы алдағы төртжақты тарифтік келісімді атап өтті.
Кездесу қорытындысы бойынша Иран президентінің 2025 жылғы желтоқсанда Қазақстанға сапары кезінде қол жеткізілген келісімдерді орындауды жеделдету және көлік-логистика саласына инвесторлар тарту жұмыстарын белсендіру ниеті расталды.